يوما دأربا ( 4 ) ( شلاما ملاخايا )

( يوما دأربا ( 4 )

( شلاما ملاخايا )

كود بشله مشودرا كورييل ملاخا من الآها لكيبد برتا من نصرت . أيويره لكيبح ودريله الح شلاما وميره : شلاما ألخ يا مليثا نعمه مارن أماخ ( لوقا . 28 ) . آني تنياثا شلاميلي دشميا تا أرأ ورمزيلي الد قريوثا بيناثن ونيشنيلي الد حوبا وحنينوثا دالآها تا برناشوثا . بثد كمله زونا تد شاقل تنيثا دالآها بغرا بكو كاسا دبثولتا وآذ شلاما دبشله ميرا تا مريم نيشنيله الد خلاص دبايش أويذا بيرصوبا دأيشوع .
أذ شلاما ملاخايا كم تانيله أمد زونه كول أن دبئيلي مريم ودريلي بكاوح تكلونا ديي .
كم تانيله سهذه بعدانا دموثي وأينه ديي بخيارا صوب ملكثا ديي وأنن بطلابا مناح نعمه دثبيتوثا تد لا مزعزعا هيمانوثي .. كم تانيله قديشه وكينه وكطلبيوا من مريم دهوياوا محمينيثاي وياوالي خيلا دمكملي عجبونا دمريم الد أرأ ودبرسي بكو علما يولبانا وروحا دأيونكاليون قديشا .. كو تانيله ببواثن وأخنواثن قمايي بزونا دبصخوثا ودحشا .. بكو روخاني وبكو عوقاني بهيمانوثا عموقا وبحوبا رابا وبتكلونا علويا . وكطلبيوا بوركاثا دمريم تا ناشه دبيشا وتا ياله ديي وبلخوني تد خاهي خايه دمشيحاي طاوه . بشما دمريم دألح شلامه أن بش طاوه وأن بش علويه .. وماقا لزيميوخ أخني دمدامخ بأني ناشه طاوه وكينه ودمقم منن . وتانخ آذي شلاما بحوبا رابا دبرونوثا بكو بصخواثن وبكو عوقانه دين . بكو نيخوثن وبكو جيهون . كود أخني بطلابا ومشبلوبه من آذي يما قدشتا تد خيرا ألن بأينا درحمه وحنينوثا ومبرخا باتن ونشواثن وأثرا ديين وكولي أثرواثا . ومرحقا منن ومن كول علما شراثا وشغوشيه وعوقانه وكبنه وكيوه وكورهانه تد خاهخ بشلاما وشينا وبصخوثا ومكملخ بكو خايين عجبونا دمريا .
وماقا بسيميلي خايه كود خاهخلي بعجبونا دمريم . وبكو مريم بد شقلخ بوركاثا دشميا آمين .
( قصتا )
كمحكي الد مكليانا ( مكتشف ) كريستوف كولمبس ) آوا دركوله بياما وزيره أثرواثا رحوقه هول دمطيله بخرثا وكلياله أمريكا . كمحكي اليح ديوا عميقا بأودوثا مدمريم بثولتا من زوروثيح . وكول شولا دقايموا بكاويح كها قميثا مصاليوا وطالبوا من مريم دعيناله ومبرخاله . وكود موحضيره مركويح دياما . مصوليله ودريله مركويح وكيانيح خوثد حمايتا دمريم بثولتا . وقريله شما دمركويح : سانتا ماريا .. يعني قدشتا مريم وركوله لياما وزله . وكود آهو بياما مصاليوا كود يوم صلوثا دورديه وقاريوا لخورانيح ديوا منيح. دمشركيله بصلوثا . وقريله شما دخا مذيتا من مذيناثا دكم خازيلي بشما دروزاريو . يعني : ورديه .
وكول أيمن دقايموا بوخا وزيعاوا ياما وعاليوا كوله ونبلاوا زدوثا بلبا دخورانيح وعيقيوا ومدردميوا اليح . آهو داريوا تكلونيح بمريم . كوخوا دياما . وطالبوا حمايتح وعون ديح تد مهديا لبواثا دخورانه ديح ودريا بكو ياما شتقا ونيخوثا .
وهادخ مطيله الد نيشن ديح وخزيله وكليله تا علما .. علما خاثا .. أمريكا بحمايتا وعون دمريم بثولتا .
( أيقارا )
تني بأيقارا ومشتاقوثا ( شلاما ملاخايا ) وأوذلوخ عاده دأمرته كود يوم بعدانا دباءت وآرت بكاوح .
نافذة
( شلاما ألخ يا مليثا نعمه ) ( 2 )