يوما دخمشا وأسري ( 25 ) ( مسابخ عجبونن تا ألاها )

( يوما خمشا وأسري ( 25 )

( مسابخ عجبونن تا الآها )

كول صلاواثا دمقروخلي تا ألآها وتا قديشه . أن هاوي صلواثا دطخسه . ين صلاواثا خنه دمصالخلي لخوذن . كولي كختميلي بتنياثا دخوتاما ديلا آمين . ديله بوشاقح . هادخ هاوه . وبكو آذي كم سابخ عجبونن تا ألآها . بخوتاما دصلواثن كود أمرخ : هادخ هاوه يا مريا .. أذ تنيثا بشطتا كميذألن ألد تريء شوله : أو قمايا . ألد أمود مكيخا بكيناثا دمصليانه بيد مريا بد مجاوب صلوثي . وشولا دتريء . مسبويه عجبونا ادمصليانه تا عجبونه دالآها راما . والآها كياذيء سنيقواثا دبنيناشا مقم ما دطلبي منيح وكم جاوبلي ديخشبرا طاليح وبتراوي آني : أخني كشقلخ دوميا من مريم كود ميرا تا ملاخا كوريل : هوون آنا خدمتا دمريا هاويلي مغديكد تنيثوخ .
لازموثيلا ربثا طالن بكو خاين دهاوخ بدائموثا قريوه لآلآها بصلوثا ودارخ كيانن وكل آني ديلي خوذرانن وكل عواذه دين وبولخونن خو أينه دالآها بابا بتنيثا د آمين دأمرخلا بعومقا دلبن . وهاوخ كولن أمود وتكلونا وهيمانوثا وحوبا بيد الآها بابيله مرحمانا . آوى دكياول موهواثا وخلياثا طاواثا تا ياله ديح . ولا كمربه أيذيح منن ولا كمنشه من مجوبه لقالا دصلثن ومكموله دسنيقواثا دين آمين .

( قصتا )

أثوا بكو روما شاتا ( 1846 ) خا شبيلا , ياتوا بخا قورنيثا درقول أيتا دبثولتا يما دعون ومن دوكثيح كطالبوا من مريم دمبسماله من كورهانيح . وبخا من يوماثا بشله مصلويه بخميموثا وبطلابا من مريم وآمروا : يا مريم يمي .. هوون نطيرا زونا يريخا وآنا أريا أمود قويا بكاوخ وتكيلا لرحمه ديخ . بدم هولا عكازي شقولا يا يما حنين وآنا لا كشوقنا أذ دوكثا هول دمدأرت الي قوتي وصاخوثي . ومريم بثولتا شميلا قالا دأو شبيلا مسكينا دطلبله منح من عومقا دلبيح دياواله بوساما .
وبريلا عجيبوثا . وبسمله من كورهانيح بتمامتا وبعدانح قمله ريش أقلاثيح ومليله بصخوثا ربثا وأويره لأيتا تد شاكر طوتا دبثولتا مريم يما دعون ورحمه . آيا دمجووبلا لصلوثيح وكو ببسماله من شبيلوثيح . وبرسله خبرا دآذي عجيبوثا بكو كولح مذيتا وثيلي ناشه من كل باره وجمعلي لأو شبيلا دبسمله وأيني ملى من دمئه دبصخوثا .
وبخرثا أويري لأيتا وبشلي مشبوحه ومزموره تا يما بثولتا آيا دكشما بدائموثا لقالا دكل آوى دقاره لكيبح وطالب منح بحوبا وهيمانوثا عون ورحمه .

( أيقارا )

( مسا بي عجبونوخ بأيموثا تا الآها . بكو بصخواثوخ وحشوخ بكو روخانوخ وعوقانوخ بيد الآها بابيله حوبانا ومرحمانا )

( نافذة )

( هاوه عجبونخ ديخ ديلي بشميا هادخ هم بأرأ ) ( 2 )