يوما دأشواسر ( 17 ) ( تخملتا بكو صيهوا دكيانا دبرناشا تا لبا دأيشوع قديشا

( يوما دأشواسر ( 17 )

( تخملتا بكو صيهوا دكيانا دبرناشا تا لبا دأيشوع قديشا )

كشاوقلن يوحنان أيونكيلايا ، دحملخ قامد خا محكيثا بسيمتا ، بريلا بيني مشيحا وبختا شمريثا كيبد بيهرا دبابن ديعقو . كمحكي تراوي ألد مايا ديله خا مندي أساس تا خايه ، وهادخ كشمخ أيشوع وأون بيمارا : أو دكشاته من مايا دكيون آنا ، لا كصهه أبد . ( يو 4 / 14 ) .
أيشوع بدائموثا كبئه تد مسوه لبواثا دبئايح ، من هادخ كامر : أو دصهه ، شود أثه لكيبي ، ومن دمهيمن بكاوي شود شاته ، ديخ دبشله ميرا بكو كثاوا : بد بلطي من كاسيح نهره من مايا دخايه . ز ( يو 7 / 38 ) .
كبيرا كجيلخ ألد نبوءه مشوخلبه كخشوخلي بمسوئي صيهوا دين : مخ اتروثا ، وشهوتا ، وشولطنوثا . . . وتمامتي . . . كشاتخ ، وكشاتخ مني ، لكن بثر خا بينا كصهخ كها خرتا . ( يو 4 / 13 ) ، بيد لبا دبرناشا بش رابيله بكبيرا من دبايش مليا بكو هادخ نبوءه زونانايه ، مسبب أذي لا كخازخله برناشا نيخه ألا بلبا دأيشوع ديله معمرا دنيخوثا وهديوثا ، وأيكاها فقط ، كسايد صيهوا دكيانا .

( قصتا )

ليلا مريم مغدليتا أيا ديلا تخرتا بأيونكاليون ، بلخوذح حطيثا دتيولا ومشخلبلي خايح ، ومبدل ما ديوا كيبا دتعستا تا مهويمنه ، بشلا مره صبيثا تا كول براتا كيبا تد خيرا بكاوح .
أديو يوما بمحكخ ألد خا براتا شمح ( مرغريت ) من مذيتا د( كووتونا ) بأيطاليا ، هويلا مرغريت بشاتا 1247 ، وخهيلا خايه نيخه بكو بيثح ، لكن بثر ما دبشله عمرح ( 18 ) شنه .
مدوشني خايح مشخلوبه قصا . قصا ، وبشلا كجيلا بثر شوحا بطيلا وميل بليمه ، هول دشوقلا بيثا دبابح ، ومسولملا كيانح وبغرح تا شهوتياثا سنيه وخطيثا ، وبشلا لي حاله تشأ ( 9 ) شنه ، بثر ديخ كويرا ، ألا كورح بشله قطيلا بخأ قطلتا دون .
وكود زله مرغريت تد خزيا كورح بدوكا ديوا قطيلا بكاوح ، زديلا من حزويح وأون كويلا بدميح ، وبعدانح كم مخيالا نعمه دلبا دأيشوع وحنينوثيح ، ومقوللا قم كيانح تد تيواوا ، وهادخ مشوخلبلي خايه دمرغريت كها خرتا ، لكن أذ كاها صوب الآها وخدمتيح ، واويرا لديرا وخدماوا فقيريه ، وموفتلا شنه دخايح خرايه وأين حوشتا كيانح مشبلوبه من لبا دأيشوع رحمه وشوقانا طاليح وتا كول حطايه ، هول دمشونيلا لشميا بشاتا ( 1297 )، بثر ما دبشلا دوميا تا كول مهويمنه وببريشوثا تا أنشه وخماثا .

( أيقارا )

أن أيوت أريا بأو مندي دكمحطيلوخ ، أيذوء بدم ، دأيشوع بلخوذيحيله نبؤا دكمسوه كيانوخ وكمنخلا .

( نافذة )

يا يما درحمه مراحم ألن .
يا لبا دأيشوع قديشا مراحم ألن .
يا لبا دمريم دلا موما مصاله مبدالن .