خطار عدنه الفرح اعلك صواني اشموع

خطار عدنه الفرح اعلك صواني اشموع

خافن يمر بالعجد , رش العجد بدموع

يا قلبي , وين الحزن...حدر الحدر مرفوع

دومك تون ,,,ونتك تبكي ابدمع مفجوع

بالك تصيح ابحزن صوت الحزن مسموع

خطار عدنه الفرح اعلك صواني اشموع

شكبان..ليلك غضب..بالك تفر بالليل

دافن بصيص الامل سهر نجوم اسهيل

والريل فات اوجزه...مالك شغل بالريل

حط النه..موقد جمر...زود سعير الويل

ذوب شموع الوصل...فرهد حبابي الهيل

بس لا يبوك العمر...طيف العمر ملسوع

خطار عدنه الفرح اعلك صواني اشموع

لملم....سنين العمر...نعثرها ليل الضيم

فارشها فوق الهضم طرزها لون الغيم

مشتال عمرك ذبل...ماحن نثيث الديم

والكيظ اجاك بثكل...بصرك تظل امجيم

خيال حلمك مرك شتكله؟ عيب انهيم؟

يبست انهار الأمل...انتظر روحي اتموع

خطارعدنه الفرح اعلك صواني شموع

بدموعي طيفك غرق ....امسح دموع الطيف

شمسح ...؟..جزاني الوكت....راح الحلم يا حيف

كمرية ما مش بعد...ليش احنه موش ابصيف؟

ظلمة...او دواشك حزن..لا تظن روحي ابكيف

غرب شراع الفرح ...اهلا اجانه الضيف

حسبالي يسوه العتب ثاري العتب مرفوع

خطار عدنه الفرح اعلك صواني اشموع


الشاعر عزيز السماوي