☤ وينــچ يـا يمّـــــه / شــــعر شـــــعبي ☤

وينج يا يمه ؟؟

صباح الخير يمه تلـگي بنتج جاية
گومي من الگبر وبلهفه شميني

صباح الخير يمه وگومي آفتحي الباب
طولت بغيابي أرجوچ أعذريني

مرت مده يمه ورسمي عنّــچ غاب
بس موبيدي والله وزين تدريني

آنَـــــه بنتج ييمه وما أخون رباچ
بس الغربه حالت بينچ وبيني

گوميلي ييمّــــه وكسري السّــرداب
وبنفس الجفن وياچ غطيني
‏
گوميلي ييمّــه بگلبي تسعر نار
محتاجة لحنانچ فدوه ضمّـيني

گوميلي ييمّــه عيوني اجت خطار
تشگيلچ عذابي وغربة سنيني

آسمعيني آسمعيني آسمعيني
أريد بگبرچ أغفه ،، وياچ خليني
‏
من يوم الدفنوج يمّــه مامرتاحة
شلت الهم ييمّــه منهد عشريني

وطلگت الفرح يايمّـــه ثلث إيمان
وربطت الحزن شـدّيته بيميني

لان ماأگدر أنسه وداعتچ معذوره
أسمچ هو دمي وكل شراييني

گوميلي ييمّــه وداعتچ تعبانة
بس بشوفتـچ آبره وتبتسم عيني

بس أنتي الوحيده القادره بها الكون
بتراب الچفن يحبيبه تشريني

آسمعيني ييمّــه وگومي أترجّــاچ
ما مرجيه منّـچ هيچي تـأذيني

گوميلي آنه جيتچ ما أريد أعذار
طشرني الوكت يايمّــــه لمّـيني

طبعچ وآنه أعرفچ ملگه للخطّـــار
خطّـارچ عزيز وما تفشليني

آنفضي تراب گبرج كسري السّـرداب
وبطيبـتْ كلامچ يمّــه حاچيني

محتاجة النّصيحه وداعتچ محتارة
شوريني يا أمي أرجوچ آنصحيني

أعرفچ أنتي دومچ ماطبگتي الباب
شنهو الغيّــرچ يحبيبه فهميني ؟

مو چنت آنه أمر وحدي بها الكون
ولو خلص حليبچ ، دمْ ترضعيني

ولو مرني الگـدر والآه والأحزان
بعيونچ ييمّـــه أنتي التشافيني

آسمعيني يا أمي أرجوچ آسمعيني
أريد اليوم أوفي شويّـــه من ديني

معذوره يا أمّــــي وأدري ملك الموت
مايعرف رحم لا فرصه ينطيني

أخذ مني الحبيبه وجتّـــــى ربّ الكون !! .

* مُنتـدى عـــــراق الحريّـــــة *

تسلم وتعيش أخي العزيز
مع جزيل الشكر لهذه الروائع والكلمات المؤثرة
تحياتي

♱ الأم ♱ هـذه الإنسانة العظيمـــة في حياتنـــا ! تربّينا ونحنُ صغار !
تسهر وتفني عمرهـــا كي نستمر في دروب الحياة !
تخدمنــا اكثر ممّـــا نخدمهـــا ! ولا تطلب منّــــا أجرة الخدمــــة !
فكيف نجازيهـــا ؟؟؟
اخي الفاضـــل مسعود هرمز النّوفلي !
جزيل الشّـــــكر للمــرور الغالي ؛ والمشاركـة اللّطيفـــة !
ربنا يسوع يبارك حياتكــم آميــــن .