قصيدة شعبية عراقية : حتى اللطامه طلعوا حراميه !! ..

علي كاشف الغطاء

نفس الطاس والحمّام
العراق اشلون تاليّه ؟
حته اهل اللطم والنوح
شو طلعوا حراميه..!
عصابه التمّت ابغداد
نصهم مو عراقيه..
محابس كله خمسه غرام
وسبحهم واحد وميّه..
عمايم تبجي يم حسين
وبالخارج افنديه..
نفس الآه والونّه
وطنّه اتقوده لوتيه..
فلم هندي الوطن والله
فلم وابطاله عجميه..
شدّوا عالجلاب اسروج
ومهرتك بالمنافي اتلوب
عطشانه لكطرة اميّه
افرح يالتريد تفوز
فايز الف بالميه ..
صار الموت مثل الزاد
لاخوّان لاعمّه ولاخيّه
صوتك ياعراقي انباك
دجاجه اتفرهدت بالريش
دجاج ويمه واويه ..
مو اصوات بالصندوك
هاي الناس مرشيه..
نازل ياقطار الآه
تعوي ابليّه عبريّه..
لاشاعر.. ولا فنان
كراسي وكلها اميّه
شيفيد القلم مكسور
بلاد بلايه حريه..
وكل مسؤول يم البيت
ناصبله فضائية..
صحافه ومثل شكل الذيل
هاي ذيول ملويه..
لاطارش ولامكتوب
صناديك الوطن بجفوف حمديه
مسكين الشعب مظلوم
عايش كله بالنيه..
يركض والعشه خباز
وساسه تفرهد الليّه..
لانفطات لاشكرات
حصه وكلّه منيّه..
الهي اليوم اشكيلك
وأكلك عالجره بيّه..
نفطات الوطن تنباك
وآنه اطفالي مسبيّه..
نفس الطاس والحمام
بلادي ابليّه حنيّه..
اصبر يافقير الحال
هاي الشدّه مكضيه..!