‏أحد الأصدقاء كتب في صفحته ... صديقي ( عمار ) مسيحي , بحكم الاوضاع طلع من العراق وصارله 4 سنوات عايش بـ هولندا .. قبل يومين س

‏[ندعوك للتسجيل في المنتدى أو التعريف بنفسك لمعاينة هذا الرابط]‏ و‏‎[ندعوك للتسجيل في المنتدى أو التعريف بنفسك لمعاينة هذا الرابط]‎‏

أحد الأصدقاء كتب في صفحته ...

صديقي ( عمار ) مسيحي , بحكم الاوضاع طلع من العراق وصارله 4 سنوات عايش بـ هولندا .. قبل يومين سألته عن ( بيت عمه ) الي عايشين بالموصل واحوالهم وشلون امورهم ماشيه هناك ؟ , جاوبني وگال : " يمعوود هذا عمي قافل ميطلع ويگول شراح يسوولي ؟ اكو غير يکتلووني ؟ ديلا قابل احنا احسن من الراحوا ولو امووت ما اطلع من بيتي " ...
المهم بالموضوع مو كلام ( عم عمار) , بس كلام ( عمار ) نفسه بعد ان سألني وين راح اگظي العيد وگال : " تعرف , احلى شي بالعيد بالعراق هي تكبيرات الجامع اليم بيتنا , من الصبح جنت اكعد من النوم و اوكف بالباب اعايد الشارع كُله .. صارلي اربع سنين لا سامع تكبيير جامع ولا معايد جيران " و بده يبچي ..
كلمات عمار ودموعه كانت بمثابة مركبة سفر عبر الزمن او فوران سريع للاحداث بالذاكرة من خلالها اتذكرت :
استاذ حسام والي كان درس اللغة العربية مالته اشبه بدرس رديف للاسلامية هلكد ميكتب على السبورة آيات قرآنية للاستشهاد بيها قواعدياً ولغوياً , استاذ حسام كان مسيحي ..
ام دينا جيراننه والي كانت تطبخ كل سنة بعاشور هريسة وتوزعها على الجوارين حتى تووفي نذرها برجوع ابنها سالم من حرب الكويت , ام دينا كانت مسيحية ..
بيت ابو عادل جيران بيت جدي , والي امي ودتني يمهم من جنت صغير بوفاة جدي , خوفاً علييه من ضجيج الفاتحه , اسبووع ابوهم ( ابو عادل ) ميقبل ينفتح تلفزيون ببيتهم حزناً على جدي ومصابه , ابو عادل كان مسيحي ..
تذكرت نفسي , بصف ثاني ابتدائي من كنت ارووح واجي من كدام الكنيسة الي يم مدرستي , واحاول استرق النظر بداخلها بفضول , يومها اجتي الماسيرة ( الراهبة ) واخذتني من ايدي وهي مبتسمة وكالت كلمات مفتهمت معناها الا بعد سنين : " لا تخاف حبيبي ادخل , هذا بيت يسوع , بيت كل مؤمن بالله مهما جان دينه " ..
اني متأكد كل واحد بيكم عنده نفس هاي الشخصيات بحياته مع اختلاف المسميات , المسيحي او الصابئي اخوك بهذا البلد , عاش وياك وطلع وياك و اجه بعرسك و واساك بوفاة اقاربك , هم ( ملح ) هاي الارض و واهم الي يظن انه يكدر يقتلعهم من جذورهم بهجمات بربرية منحطة , يربطنا بيهم الايمان بالله , يربطنا بيهم حب هذا الوطن .. وحب الوطن شغف ومثل ما الايمان بالله مطلوب ولا يمكن مناقشته , الشغف هم مطلوب .
والي يكول انه هو فعلا مسلم خلي يقتدي بالرسول ( صلى الله عليه وسلم ) لمن كال : ( من آذى ذمياً كنت انا خصيمه يوم القيامة ) , فالله الله بذميي الرسول محمد ( عليه الصلاة والسلام ) .